ઇશરત એન્કાઉન્ટર નકલી

‘સિટ’ના ત્રણેય સભ્યોનો એકમતઃ કસૂરવારોની ધરપકડની તૈયારી


ઇશરત નિર્દોષ જાહેર થતાં ખુદા પર મારો એતબાર વધ્યો છે. મારી દીકરીનું ખોટું એન્કાઉન્ટર કરનાર દોષી ગુજરાત પોલીસ અધિકારીઓને સખત સજા થાય એમ હું ઇચ્છું છું. - ઇશરતની માતા શમીમ કૌસર જહાં ----- મને લાગે છે કે આરોગ્યની મર્યાદા છતાં મારા લાંબા સંઘર્ષનું સારું પરિણામ આવ્યું છે. મને ન્યાય મળ્યો છે. હું ન્યાય મેળવવા માટે લડી રહ્યો હતો અને અદાલતના આ આદેેશથી ઇશ્વરમાં અને ન્યાયતંત્રમાં મારો વિશ્વાસ વધુ દઢ થયો છે. - જાવેદના પિતા 

અમદાવાદઃ અમદાવાદના સીમાડે કોતરપુર વોટર વર્ક્સ નજીક ૧૫ જૂન, ૨૦૦૪ની વહેલી પરોઢે મુંબઈની યુવતી ઇશરત જહાં સહિત ચાર શકમંદને અમદાવાદ ક્રાઇમ બ્રાન્ચની ટીમે નકલી એન્કાઉન્ટરમાં ઢાળી દીધા હોવાનો ધડાકો સ્પેશિયલ ઇન્વેસ્ટિગેશન ટીમ (સિટ)ની તપાસમાં થયો છે. સોમવારે હાઇ કોર્ટમાં રજૂ થયેલા તપાસ અહેવાલના આધારે અદાલતે નવી ફરિયાદ દાખલ કરવાનો પણ હુકમ કરતા સરકાર અને તંત્રમાં ધરતીકંપ જેવી સ્થિતિ સર્જાઇ છે. અત્રે ઉલ્લેખનીય છે કે, ગુજરાત પોલીસ ઉપર નકલી એન્કાઉન્ટરનું આ બીજું નક્કર આળ છે. આ અગાઉ ૨૦૦૫માં સોહરાબ-તુલસી એન્કાઉન્ટરકાંડમાં ડી.જી. વણઝારા સહિત બે ડઝન જેટલા પોલીસ અધિકારીઓ અને કર્મચારીઓ અત્યારે જેલની હવા ખાઇ રહ્યા છે તે ટાણે જ આ ઘટસ્ફોટ થતા તંત્ર ધ્રૂજી ઉઠ્યું છે.
ગુજરાત હાઇ કોર્ટના આદેશના પગલે ઇશરત એન્કાઉન્ટર પ્રકરણની તપાસ કરતી કેન્દ્રીય આઇપીએસ અધિકારી આર.આર. વર્માના વડપણ હેઠળની સિટએ એન્કાઉન્ટર સાચું છે કે ખોટું તે દર્શાવતો અહેવાલ ગત ૧૮મી નવેમ્બરના રોજ સીલબંધ કવરમાં રજૂ કર્યો હતો. સોમવારે યોજાયેલી આ કેસની સુનાવણીમાં ન્યાયમૂર્તિ જયંત પટેલ અને ન્યાયમૂર્તિ અભિલાષાકુમારીની ખંડપીઠે ડાયસ ઉપર બેસતાની સાથે જ બપોરના ૨.૪૫ કલાકે ‘સિટ’ના અહેવાલને ટાંકીને એન્કાઉન્ટર બોગસ હોવાનું જાહેર કર્યું હતું. કોર્ટે વધુમાં કહ્યું હતું કે, આઇપીએસ આર.આર. વર્માના વડપણ હેઠળની ટીમના ત્રણેય સભ્યોએ એન્કાઉન્ટર બોગસ હોવાનો અભિપ્રાય વ્યક્ત કર્યો છે. ઇશરત સહિત ચારેયનાં મોત અને પોલીસે એન્કાઉન્ટરનો દર્શાવેલો સમય અલગ-અલગ છે. જેથી ચારેયને કયા કારણોસર ઠાર મરાયા? તેમાં કોણ-કોણ સંડોવાયેલું છે? તથા તમામની શું ભૂમિકા છે ? તેની તપાસ માટે નવી પોલીસ ફરિયાદ નોંધી હત્યાનો ગુનો નોંધવો જોઈએ.કોર્ટે વધુમાં કહ્યું હતું કે, આ કેસ જેન્યુઇન એન્કાઉન્ટરનો નહીં પરંતુ હત્યાનો છે. જેથી કેસની વધુ તપાસ માટે સીબીઆઇ નેશનલ ઇન્વેસ્ટિગેશન એજન્સી (એનઆઇએ) હાલની ‘સિટ’ કે રાજ્યની એજન્સી મારફતે કરાવી શકાશે. ‘સિટ’ને એન્કાઉન્ટર સાચું છે કે ખોટું તે તપાસવા માટે આદેશ કરાયો હોવાથી સિટના વડા આર.આર. વર્માએ આખરી અહેવાલ રજૂ કરીને મુક્ત કરવા અરજી કરી છે.
ઇશરત કેસની હવે પછીની તપાસ માટે ‘સિટ’ દ્વારા અસહમતી દર્શાવાતા કોને તપાસ સોંપવી તે બાબતે સુનાવણી યોજાઇ હતી. જેમાં અરજદારોએ કેસની વધુ તપાસ ‘સિટ’ કે એનઆઇએ મારફતે કરાવવા માંગણી કરી હતી. જ્યારે સરકારી વકીલે અરજદારોની માગણીનો વિરોધ કરીને વધુ તપાસ ગુજરાત પોલીસ મારફતે કરાવવા રજૂઆત કરી હતી. બીજી તરફ કેન્દ્ર સરકારના એડવોકેટે આ કેસમાં નવી ફરિયાદ નોંધવાની રજૂઆત કરી હતી તેમજ ‘સિટ’ તપાસ કરે તો તેને તમામ પ્રકારની સુવિધા પૂરી પાડવાની તૈયારી દર્શાવી હતી. આ ઉપરાંત સીબીઆઇ અને એનઆઇએનો તપાસ લેવા માટે અભિપ્રાય મેળવીને ૨૩મી નવેમ્બર સુધીમાં જવાબ રજૂ કરવા સમય માંગ્યો હતો. જેથી હાઇ કોર્ટે વધુ સુનાવણી ૨૩મી નવેમ્બર પર મુલતવી રાખી હતી.
અત્રે ઉલ્લેખનીય છે કે આજે હાઇ કોર્ટમાં યોજાયેલી સુનાવણીમાં એન્કાઉન્ટર સાથે સંકળાયેલા એક પણ પોલીસ કર્મચારી હાજર રહ્યાં ન હતા.
--------
સમયનો કાંટો ગાળિયો બન્યો

ઇશરત સહિત ચારેય કથિત ત્રાસવાદીઓના એન્કાઉન્ટરનો દર્શાવેલો સમય તથા ચારેયના મૃત્યુના સમયનો તાળો નહીં મળતા ‘સિટ’ના ત્રણેય સભ્યોએ મેજિસ્ટ્રેટ તામંગની જેમ એન્કાઉન્ટર બોગસ હોવાનો અભિપ્રાય અહેવાલમાં વ્યક્ત કર્યો હતો.ગત ૧૫મી જુલાઈ ૨૦૦૪ના મુખ્ય પ્રધાન નરેન્દ્ર મોદીને ઠાર મારવા આવેલા ઇશરત અને જાવેદ સહિત ચાર કથિત ત્રાસવાદીઓને વહેલી સવારે લગભગ ૪.૩૦ કલાકે ક્રાઇમ બ્રાન્ચે કોતરપુર વોટર વકર્સ નજીક એન્કાઉન્ટર ઠાર માર્યાં હતાં. જ્યારે તેમના પોસ્ટમોર્ટમ રિપોર્ટમાં હોજરીમાં અર્ધપચેલો ખોરાક મળી આવ્યો હતો. જેથી મેજિસ્ટ્રેટ તામંગે પી.એમ. રિપોર્ટ તથા એફએસએલના અહેવાલને ધ્યાનમાં રાખીને પ્રણેશ પિલ્લાઇ ઉર્ફે જાવેદનું ૧૪મી જુલાઇના રોજ રાત્રે ૮.૩૦થી ૯ની વચ્ચે તેમજ ઇશરત સહિત ત્રણેયનાં મોત ૧૪મી જુલાઇના રાત્રે ૧૧થી ૧૨ની વચ્ચે થયાનો અભિપ્રાય વ્યક્ત કર્યો હતો. 
જ્યારે ગુજરાત હાઇ કોર્ટના આદેશના પગલે તપાસ કરતી સિટે પણ ચારેયનાં એન્કાઉન્ટર અને મૃત્યુનો સમય મેચ નહીં થતો હોવાનો અભિપ્રાય વ્યક્ત કર્યો હતો તેમજ એઇમ્સની ટીમની મદદથી આખી ઘટનાનું ત્રણ વખત રિકન્સ્ટ્રકશન કરીને ‘સિટે’ ચારેયનાં મોત એન્કાઉન્ટર સ્થળે નહીં થયા હોવાનો મત વ્યક્ત કર્યો હતો.